تارکین وطن کو ووٹ کاحق دینے کا بل منظورکرایا جائے گا فاروق ستار

ایم کیو ایم کے رہنما ڈاکٹرفاروق ستار نے کہا ہے کہ سمندر پار پاکستانیوں کو ووٹ کاحق دینے کا بل آخری دو دن میں قومی اسمبلی سے منظور کر ایا جائے گا۔


اسلام آباد میں تقریب سے خطاب اور میڈیا سے بات کرتے ہوئے انہوں نے کہا کہ دہری شہریت پر پابندی ختم کر کے بیرون ملک پاکستانیوں کو انتخابات میں حصہ لینے کا حق دیا جاسکتا ہے، اس سلسلے میں آئندہ دو دنوں میں آئینی بل پارلیمنٹ سے منظور کرالیا جائے گا۔ بل کی حمایت کے لئے لارڈ نذیر نے مسلم لیگ (ن)سے بات کی ہے جبکہ دیگر جماعتوں نے بھی بھرپور تعاون کا یقین دلایا ہے۔

ڈاکٹر فاروق ستار کا کہنا تھا کہ امیدواروں کی جانچ پڑتال کے لئے الیکشن کمیشن کو خود مختار ہونا چاہئے، امیدواروں کی جانچ پڑتال کے لئے 7 دن کی بجائے 15 دن ہونے چاہئیں تاکہ عوام کو پتہ ہو وہ کون سے نمائندے منتخب کر رہے ہیں۔ انہوں نے کہا کہ سندھ میں نگران سیٹ اپ کے لئے مشاورت کا عمل تقریباً مکمل ہوچکا ہے اور ان کی اطلاع کے مطابق سندھ اسمبلی 16 مارچ کو قومی اسمبلی کے ساتھ ہی تحلیل کر دی جائے گی۔