سلمان اور علی عباس کی جوڑی ایک بار پھر دھوم مچانے کو تیار 

MULTAN:
بالی ووڈ فلم 'سلطان' اور 'ٹائیگر زندہ ہے' کے بعد ہدایت کار علی عباس ظفر سلمان خان پروڈکشن کا حصہ بن گئے جہاں وہ دبنگ خان کی اگلی فلم کی ہدایت کاری بھی کریں گے۔

بالی ووڈ کو 'سلطان' جیسی بلاک بسٹر فلم دینے والی سلمان خان اور ہدایت کار علی عباس ظفر کی جوڑی 'ٹائیگر زندہ ہے' میں بھی دھوم مچانے کے لیے تیار ہے لیکن ایکٹر اور ڈائریکٹر کی اس جوڑی کا ساتھ یہیں ختم نہیں ہورہا بلکہ وہ دسمبر کی چھٹیوں کے بعد اور ایک پروجیکٹ کے لیے اکٹھا ہونے والے ہیں کیوں کہ سلو میاں نے علی عباس ظفر کو اپنے پروڈکشن ہاؤس کا حصہ بنالیا ہے۔


بھارتی میڈیا رپورٹس کے مطابق ہدایت کار علی عباس ظفر گزشتہ 6 سال سے 'یش راج فلمز' کا حصہ ہیں اور اب تک انہوں نے کوئی بھی فلم اس پروڈکشن کے باہر نہیں بنائی مگر حیران کن طور پر اب وہ 'سلمان خان پروڈکشن' کا حصہ بن گئے ہیں جہاں وہ پہلی بار یش راج فلمز نہیں بلکہ سلمان خان کی اپنی پروڈکشن میں بننے والی فلم 'بھارت' کی ہدایت کاری کریں گے اور یوں پہلی بار سلمان اور عباس کی جوڑی بطور ڈائریکٹر اور پروڈیوسر کام کرے گی۔

اس خبر کو بھی پڑھیں؛ فلم 'ٹائیگرزندہ ہے' کے ٹریلر نے ریلیز ہوتے ہی دھوم مچادی

رپورٹس کے مطابق فلم 'بھارت' ایک عام زندگی کے گرد گھومتی ہے جس کا آغاز 1947 میں بھارت کی آزادی سے ہوگا اور 2002 میں اختتام پذیر ہوگی اور فلم میں بالی ووڈ سلطان سلمان خان ہی مرکزی کردار ادا کریں گے جب کہ فلم 2019 میں سینما گھروں کی زینت بنے گی۔ دوسری جانب علی عباس کی ہدایت کاری میں ہی بننے والی فلم 'ٹائیگر زندہ ہے' 21 دسمبر کو ریلیز کی جائے گی جس کے لیے مداحوں نے ابھی سے ایڈوانس ٹکٹ خرید رکھے ہیں۔