سندھ میں نگران وزیراعلیٰ کے لئے جسٹس ریٹائرڈ زاہد قربان علوی کے نام پر اتفاق

پیپلز پارٹی اور ایم کیو ایم کے درمیان سندھ میں نگراں وزیر اعلیٰ کے لئے جسٹس زاہد قربان علوی کے نام پر اتفاق ہوگیا ہے ۔

ایکسپریس نیوز کے مطابق گزشتہ رات پیپلز پارٹی کے رہنماؤں کے اجلاس کے بعد وزیر اعلیٰ سندھ سید قائم علی شاہ کی سربراہی میں پارٹی رہنماؤں نے گورنر سندھ ڈاکٹر عشرت العباد سے ملاقات کی جس میں جسٹس ریٹائرڈ زاہد قربان علوی کے نام پر اتفاق کرلیا گیا جو بدھ کے روز اپنے عہدے کا حلف اٹھا سکتے ہیں تاہم ان کی حلف برداری تک قائم علی شاہ ہی اپنے عہدے پر کام کرتے رہیں گے۔


واضح رہے کہ جسٹس ریٹائرڈ زاہد قربان علوی کا نام حکومت نےتجویز کیا تھا۔ ان کا تعلق کراچی سے ہے اور وہ سندھ ہائی کورٹ کے جج رہ چکے ہیں۔ وہ ایل ایف اوکے تحت ریٹائر ہوگئے تھے۔

زاہد قربان علوی حکومت کی جانب سے بنائے گئے کئی عدالتی کمیشنوں کے سربراہ رہ چکے ہیں۔ اور اس وقت چیئرمین پاکستان زکوٰة کونسل سندھ کے عہدے پر فائز ہیں۔