بگرام جیل کا مکمل کنٹرول افغان حکام کے حوالے کر دیا گیا
افغان صدر حامد کرزئی نے امریکی وزیر دفاع کو یقین دہانی کرائی تھی کہ بگرام جیل سے خطرناک قیدیوں کو نکلنے کا موقع نہیں دیا جائے گا اور اتحادی افواج اور افغان عوام کے لیے خطرہ نہیں بننے دیا جائے گا۔ فوٹو: رائٹرز
امریکی محکمہ دفاع پینٹاگون کے ترجمان کے مطابق امریکی وزیر دفاع چک ہیگل اور افغان صدر حامد کرزئی کے درمیان ہفتے کو طے پانے والے معاہدے کے تحت بگرام جیل کا مکمل کنٹرول افغان حکام کے حوالے کر دیا گیا ہے ۔
افغان صدر حامد کرزئی نے امریکی وزیر دفاع کو یقین دہانی کرائی تھی کہ بگرام جیل سے خطرناک قیدیوں کو نکلنے کا موقع نہیں دیا جائے گا اور اتحادی افواج اور افغان عوام کے لیے خطرہ نہیں بننے دیا جائے گا۔ واضح رہے کہ گزشتہ سال سمتبر میں امریکا نے بگرام جیل کو جزوی طور پر افغانستان کے حوالے کردیا تھا تاہم 50 غیر ملکی اور 100افغان قیدیوں کی نگرانی بدستور امریکی فوج کے پاس تھی۔
حالیہ برسوں کے دوران اس جیل کو قیدیوں سے بدسلوکی کے واقعات کے الزامات میں بھی مرکزی حیثیت حاصل رہی ہے۔ اس جیل میں 3 ہزار کے قریب طالبان اور مشتبہ دہشت گرد قید ہیں جبکہ یہاں سات کے قریب پاکستانی بھی قید ہیں۔ بگرام جیل افغانستان میں نیٹو افواج کے بڑے فوجی اڈوں میں سے ایک میں واقع ہے۔