ویرات کوہلی پاکستان میں سنچری نہیں بنا سکتے مکی آرتھر کا بھارتی میڈیا کو کرارا جواب

ISLAMABAD:
مکی آرتھر کے ویرات کوہلی کو چیلنج نے بھارتی میڈیا کو چراغ پا کر دیا۔


قومی ٹیم کے کوچ نے ایک انٹرویو میں کہا تھا کہ بھارتی کپتان ایک شاندار کرکٹر ہیں لیکن پاکستان کی سرزمین پر میزبان بولر ان کو کبھی سنچری نہیں بنانے دیں گے۔ انھوں نے کہا کہ اگرچہ کوہلی نے تمام بڑی ٹیموں کے خلاف کھل کر رنز بنائے اور ان کی بیٹنگ سے میں بھی لطف اندوز ہوتا ہوں لیکن پاکستانی بولرز انھیں آسانی سے اسکور نہیں کرنے دیں گے۔

مکی آرتھر کا یہ انٹرویو چند روز قبل لیا گیا تھا لیکن بھارتی میڈیا کے سامنے آیا تو طوفان کھڑا ہوگیا۔ مختلف ویب سائٹس نے ویرات کوہلی کی تعریفوں کے پل باندھ دیے،انھوں نے بھارتی کپتان کی 9ٹیسٹ کھیلنے والے ملکوں کیخلاف سنچریوں،رواں سال آئی سی سی کپتان اور کرکٹر آف دی ایئر سمیت مختلف ریکارڈز کی لمبی فہرست گنواتے ہوئے مکی آرتھر کے جملوں کو تنقید کا نشانہ بنایا۔