پاکستان میں ٹیلنٹ کی کمی نہیں مسئلہ موقع ملنے کا ہے ندیم

پاکستان فلم انڈسٹری کے سینئراداکارندیم بیگ نے کہا ہے کہ پاکستان میں ٹیلنٹ کی کمی نہیں ہے مسئلہ موقع ملنے کا ہے جو نئے لوگوں کو مشکل سے فراہم ہوتاہے۔


ان خیالات کا اظہارانھوں نے نمائندہ ایکسپریس سے بات چیت کے دوران کیا ان کا کہنا تھا کہ پاکستان کے علاوہ دنیا بھر میں فلم یاڈرامہ انڈسٹری کوسرکاری سطح پرسپورٹ کیا جاتاہے مگر واحد ہمارے ہاں شوبز انڈسٹری کومتعددحلقے ماننے کوتیارنہیں ہیں سپورٹ کرنا تودورکی بات ہے۔

انھوں نے کہا کہ آج سے تیس سال قبل جب پاکستان فلم انڈسٹری عروج پر تھی تو ہم نے بہت سے نئے لوگوں کومتعارف کروایا اوراپنے ساتھ کام کرنے کے مواقع بھی فراہم کیے مگر آج چونکہ انڈسٹری بحران کاشکارہے اورکام بھی اس طرح کا نہیں ہے اگرمستقبل قریب میں شوبزانڈسٹری کودوبارہ بحال کردیا جاتاہے اورماضی کی طرح کام کرنے کے مواقع ملتے ہیں تو ہم بہت سے ایسے فنکاروں کوجنم دے سکتے ہیں کہ جودنیا بھر میں اپنی اداکاری کے ذریعے پاکستان کا نام روشن کرینگے۔