کنری دیہاتیوں نے لڑکی سے زیادتی کی کوشش ناکام بنادی

لڑکی کے ساتھ زیادتی کی کوشش، اہل علاقہ نے ملزمان کوپکڑ کر پولیس کے حوالے کر دیا۔


تفصیلات کے مطابق نواحی گاؤں ڈاکٹر غلام حیدر خاصخیلی میں 14 سالہ شیلا بنت نانجی میگھواڑ، اسپنگر کی فصل کاٹنے میں مصروف تھی کہ ظریف خان پٹھان اور شمن شیخ نامی نوجوانوں نے مبینہ طور پر اس کو زبردستی زیادتی کا نشانہ بنانے کی کوشش کی، لڑکی کے شور مچانے پر ملزمان نے فرار ہونے کی کوشش کی، اہل علاقہ نے مذکورہ دونوں ملزمان کو موٹرسائیکل سمیت پکڑکر پولیس کے حوالے کر دیا۔

تاہم گرفتارملزم ظریف خان نے بتایاکہ وہ رانجھا چانڈیو نامی شخص کو وہاں کپاس کے پیسے دینے گئے تھے اور ان پر لڑکی سے زیادتی کرنے کا جھوٹا الزام عائد کیا جا رہا ہے۔ اس کا کہنا تھا کہ ان کی وہاں زمین ہے جس پر قبضے اور ان کو جھوٹے مقدمے میں پھسانے کی کوشش کی جا رہی ہے۔