جاوید ہاشمی دروغ گوئی سے کام نہ لیں مسلم لیگ ن

PESHAWAR:
مسلم لیگ (ن) کے سینئر رہنماسینیٹر پرویز رشید نے جاوید ہاشمی کے بیان پر تبصرہ کرتے ہوئے سوال کیا ہے کہ جاوید ہاشمی یہ بھی بتائیں کہ جن کے جھرمٹ میں وہ آج صدربنے بیٹھے ہیں ، مشرف مارشل لامیں وہ کہاں تھے ؟ انھوں نے کہا کہ جاوید ہاشمی آج ان کے صدر ہیں جومشرف کو دس مرتبہ وردی میں صدر منتخب کرانا چاہتے تھے ۔

صوبائی وزیر قانون رانا ثناء اللہ نے کہا ہے کہ جاوید ہاشمی ہمارے ساتھی رہے ہیں ، وہ دروغ گوئی سے کام نہ لیں ، وقت ثابت کرے گا انقلاب کی باتیں کرنے والوںکا انجام کیا ہوگا ۔ جاوید ہاشمی کے بیان پر تبصرہ کرتے ہوئے انھوں نے کہا کہ مسلم لیگ (ن) سے شناخت حاصل کرنے والے کس منہ سے اس جماعت کے لیڈروں پر کیچڑ اچھال رہے ہیں ۔


وہ لوگ جن کو مسلم لیگ (ن) نے زیرو سے ہیرو بنایا ہے اب وہ کارکنوں کا خون بیچنے کی بات کر رہے ہیں ۔ رانا ثنا اللہ نے کہا کہ جاوید ہاشمی اپنی کتاب کا مطالعہ کرکے بتائیں کہ انھوں نے نوازشریف کی جو تعریفیںکیں وہ ٹھیک ہیں یااب جو وہ تنقیدکر رہے ہیں وہ درست ہے ۔ رانا ثنااللہ نے سوال کیا کہ جاوید ہاشمی تحریک انصاف کے کارکنوں کے ارمانوں کا خون ہونے پر کیوں خاموش ہیں؟۔