فلم ’’گلاب گینگ‘‘ میں مادھوری کے ساتھ کام کرنے کا تجربہ دلچسپ رہا جوہی چاؤلہ

اداکارہ جوہی چاؤلہ جو مادھوری کے ساتھ پہلی بار فلم گلاب گینگ میں کام کر رہی ہیں کا کہنا ہے کہ مادھوری ان کے کیرئیر میں اب تک کی بیسٹ کو اسٹار ثابت ہوئی ہیں اور ان کے ساتھ کام کرنے کا تجربہ انتہائی دلچسپ رہا۔

فلم گلاب گینگ کی شوٹنگ مکمل ہونے کے بعد دی گئی ایک پارٹی میں جوہی چاؤلہ نے کہا کہ فلم گلاب گینگ میں کام کرنے کا مزہ اس لئے بھی اور زیادہ آیا کیونکہ فلم میں ان کے ساتھ مادھوری کام کر رہی تھیں، ماضی میں مادھوری کے ساتھ سالوں جاری رہنے والی ٹکر کے حوالے سے جوہی نے کہا کہ ایک زمانے میں ہم دونوں ایک دوسرے کے مد مقابل سمجھے جاتے تھے اور اگر کسی پارٹی میں مادھوری سے آمنا سامنا ہو بھی جاتا تھا تو ہمارے درمیان انتہائی کم بات ہوتی تھی اور ہم ایک دوسرے سے صرف سلام دعا کر کے آگے نکل جاتے تھے۔


جوہی نے کہا کہ آج سالوں بعد انہیں مادھوری کے ساتھ کام کرنے کا موقع ملا تو وہ اس پر کافی خوش ہیں، جوہی نے کہا کہ جب انہوں نے سنا کہ فلم میں مادھوری ہیروئن ہیں اور انہیں ان کے مخالف منفی کردار نبھانا ہے تو فلم میں کام کرنا اور بھی آسان ہو گیا۔

جوہی نے کہا کہ فلم کے ہدایت کار سومک سین نے فلم شروع کرنے سے پہلے پوری کاسٹ کو ایک ساتھ بلا کر اسکرپٹ پڑھ کر سنایا اور اس کے بعد شوٹنگ سے پہلے مجھے اور مادھوری کو اپنے دفتر میں بلایا اور کہا کہ تم لوگ آپس میں کبھی بھی کسی بھی چیز کے بارے میں بات کر سکتی ہو جس کی وجہ سے میرے اور مادھوری کے درمیان بات چیت کرنا کافی آسان ہو گیا۔