طالبان سے مذاکرات افغانستان کا پاکستان اور سعودی عرب سے رابطے تیز

افغان حکومت نے اتحادی فوج کے انخلا کے بعد ملک میں امن اور طالبان سے مذاکرات کا عمل آگے بڑھانے کیلئے پاکستان اور سعودی عرب سے رابطے تیز کرنے کا فیصلہ کر لیا ۔ ذرائع کے مطابق افغان حکومت آئندہ سال امریکی افواج کے انخلا سے قبل انتظامی ڈھانچے کی تشکیل ، مفاہمتی عمل میں تیزی اور ملا عمر کے نائب ملا عبدالغنی برادر کی حوالگی کیلئے پاکستان اور سعودی عرب کا تعاون حاصل کریگی ۔


سفارتی ذرائع نے بتایا کہ افغان صدر حامد کرزئی اور امن کونسل کے سربراہ صلاح الدین ربانی14اور 15اگست کو سعودی عرب میں مسلم یکجہتی کانفرنس کے موقع پر سعودی فرمانروا شاہ عبداللہ اور پاکستانی قیادت سے ملاقاتیں کریں گے جن میں مفاہمتی عمل میں پیشرفت اور پاکستان کا کردار زیربحث آئے گا ۔ ذرائع کا کہنا ہے کہ افغان امن کونسل کے سربراہ عید کے بعد اپنے دورہ پاکستان میں حکومتی عہدیداروں سمیت جمعیت علمائے اسلام کے دونوں دھڑوں اور جماعت اسلامی کی قائدین سے ملاقاتیں کریں گے۔