چھاتی کے سرطان میں خطرناک اضافے کی وجہ ماڈرن لائف اسٹائل ہے برطانوی تحقیق

برطانوی تحقیقاتی ادارے نے چھاتی کے سرطان میں خطرناک اضافے کی وجہ ماڈرن لائف اسٹائل کو قرار دیا ہے۔


برطانیہ کے کینسر ریسرج سینٹر کی تحقیق کے مطابق ملک میں 50 سال سے کم عمر کی 27 خواتین روزانہ چھاتی کے سرطان میں مبتلا ہو رہی ہیں جبکہ ایک سال میں چھاتی کے سرطان میں 10 ہزار خواتین کا مبتلا ہونا تشویش کی بات ہے، ادارے نے کینسر کے مریضوں کی بڑھتی تعداد کی وجہ ماؤں میں ماڈرن لائف اسٹائل کو قرار دیا ہے۔ 30 اور 40 سال کی عمر میں بچے پیدا کرنے کا بڑھتا ہوا رجحان، کم بچوں کی پیدائش اور انتہائی کم عرصے تک بچوں کو ماں کا دودھ پلانا جیسے عوامل چھاتی کے سرطان کا خطرہ پیدا کر رہے ہیں ، شراب نوشی کی کثرت اور ورزش نہ کرنا بھی کینسر کی وجہ ہے۔

چھاتی کا سرطان ہر سال دنیا بھر کی 12 ہزار خواتین کی موت کی وجہ بن رہا ہے، فیملی پلاننگ کے لئے لی جانے والی مانع حمل کی گولیاں بھی اس موذی مرض میں اضافے کا سبب ہیں جبکہ عام طورپرچھاتی کا سرطان 50 سال سے بڑی عمرکی خواتین کو ہوتا ہے، تاہم ہر 5 میں سے ایک مریض 50 سال سےکم عمر ہے۔ علاج کی جدید سہولیات اور لوگوں میں بڑھتے شعور کی وجہ سے گزشتہ 20 سال میں چھاتی کے سرطان سے ہلاک ہونے والی خواتین کی تعداد 50 فیصد کم ہو گئی ہے۔