میں نے کراچی کو ملک سے علیحدہ کرنے کا کوئی مطالبہ نہیں کیا الطاف حسین

متحدہ قومی موومنٹ کے قائد الطاف حسین نے کہا ہے کہ انہوں نے کراچی کو ملک سے علیحدہ کرنے کا کوئی مطالبہ نہیں کیا ہے۔


لندن سے جاری کئے گئے بیان میں الطاف حسین نے کہا کہ جو لوگ مجھ پر ایسا مطالبہ کرنے کا الزام لگارہے ہیں میں ان کے اس الزام کی سختی سے تردید کرتا ہوں، انہوں نے کہا کہ الزام لگانے والے میرے بیان کردہ نکات کو سیاق وسباق کی روشنی میں پڑھیں اور پھر اپنی رائے کا اظہار کریں۔

انہوں نے کہا کہ پاکستان کے قیام کیلئے جن کے آبا واجداد نے 20 لاکھ سے زائد جانوں کا نذرانہ پیش کیاوہ پاکستان کے خلاف بات کرنے کا تصور کیسے کرسکتے ہیں ۔ الطاف حسین نے کہاکہ اس مرتبہ عوام نے ماضی کے مقابلے میں بہت بڑی اکثریت کے ساتھ ووٹ ڈالے جو اس بات کا ثبوت ہے کہ عوام میں آہستہ آہستہ بیداری پھیل رہی ہے اور پاکستان کے عوام ایک زندہ ، باہمت اور روشن خیال قوم کی جانب تیزی سے بڑھ رہے ہیں، یہ بیداری ملک اور اس کے عوام کیلئے انتہائی خوش آئند ہے۔