سوئی میں بارودی سرنگ دھماکا 8 افراد شدید زخمی

بلوچستان کے علاقے سوئی میں بارودی سرنگ دھماکے میں 8 افراد زخمی ہوگئے۔

سویلین افراد پر مشتمل گاڑی راستے میں بچھائی گئی بارودی سرنگ سے ٹکرا گئی زخمیوں کو سوئی ہسپتال منتقل کر دیا گیا جہاں 4 کی حالت تشویشناک بتائی جاتی ہے ،گاڑی بھی تباہ ہوگئی،ادھر ڈی آئی جی پولیس کوئٹہ فیاض احمد سنبل نے کہا ہے کہ پولیس نے کالعدم تنظیموں کے ساتھ روابط اور ان کے کارکنوں کو سہولیات اور معلومات فراہم کرنے پر 2پولیس اہلکاروں کو گرفتار کرلیا ہے۔




پیر کو یہاں پریس کانفرنس کرتے ہوئے انہوں نے کہا کہ پولیس نے اطلاع ملنے پر مذکورہ اہلکاروں سمیت دیگر عملے کی نگرانی شروع کی اور مکمل شواہد حاصل کرنے پر اے ایس ائی یحییٰ اور کانسٹیبل محمدکریم کو گرفتار کیا گیا ، دونوں اہلکاروں نے انکشاف کیا ہے کہ وہ کالعدم تنظیموں کے ممبران سے رابطے میں رہتے ، کسی بھی واردات کے حوالے سے انہیں اسلحہ اور مدد فراہم کرتے تھے ،مزید تفتیش جاری ہے۔