کیا نواز شریف رفیق تارڑ کو صدر بناکر 12اکتوبر1999ء سے پہلے کی صورتحال کی تجدید مکمل کریں گے

میاں نوازشریف کی پھر دوتہائی اکثریت کے ساتھ بطور وزیراعظم واپسی اکتوبر 1999ء سے پہلے والی صورتحال کی تجدید ہے۔


اگر یہ ایسا ہے تو کیا وہ صدارت کا عہدہ رفیق تارڑ کو دینے کا سوچ رہے ہیں،جنہیں جنرل پرویزمشرف نے استعفیٰ دینے پر مجبور کیا تھا۔ تارڑ جنہوں نے ''ہائی جیکنگ کیس'' میں نوازشریف کی سزا معاف کی تھی' انہیں 2001ء کے بعد پہلی مرتبہ ایوان صدارت میں دیکھا گیا۔ استعفیٰ کے بعد انہوں نے فیصلے کو چینلج کیا تھا نہ کوئی زیادہ شور مچایا تھا۔ کم گو رفیق تارڑ جو میڈیا کا سامنا کرنے سے جھجھکتے ہیں' وہ وزیراعظم نوازشریف کی دعوت پر تقریب میں شرکت کیلئے آئے تاہم اس دوران انہوں نے صحافیوں اور سیاستدانوں سے گفتگو کرنے سے اجتناب کیا۔ ہائی جیکنگ کیس جب انسداد دہشت گردی کی عدالت میں چل رہا تھا تو یہ قیاس آرائیاں تھیں کہ مشرف کے مبینہ دبائو کے باعث نوازشریف کو سزائے موت دے دی جائے گی تاہم اس موقع پرسابق صدر نے مستعفی نہ ہونے کا فیصلہ کیا۔