ای سی ایل میں نام ڈالنے نکالنے کا اختیار کابینہ کو تفویض

وزیراعظم عمران خان نے دہشتگردوں یا دیگر ملزمان کے نام ای اسی ایل میں ڈالنے یا نکالنے کا اختیار وزیر مملکت برائے داخلہ سے واپس لے لیا ہے جب کہ ای سی ایل پرکابینہ کی ذیلی کمیٹی بھی ختم کر دی ہے۔

گزشتہ حکومت نے سپریم کورٹ کے حکم کی روشنی میں ای سی ایل میں نام ڈالنے اور نکالنے کا اختیار وزارت داخلہ سے واپس لے لیا تھا تاہم وزیر داخلہ کو مخصوص کیسوں میں نام ڈالنے کا اختیار دیا گیا تھا۔


وزیر داخلہ کسی دہشت گرد، کالعدم تنظیم کے کارکن اور سیکیورٹی اداروں کی طرف سے سفارش کردہ افرادکے نام ای سی ایل میں ڈال سکتے تھے، اب ان تمام کیسوں سے متعلق اختیار بھی وزیر مملکت داخلہ سے واپس لے لیا گیا ہے۔

اب وزارت داخلہ براہ راست ای سی ایل سے متعلق کیس کابینہ کو بھجوائے گی۔اب تمام کیسز میں کابینہ کی منظوری سے نام ای سی ایل میں ڈالے اور نکالے جا سکیں گے جب کہ وفاقی کابینہ نے اس فیصلے کی توثیق کر دی ہے۔