سپریم کورٹ نے پیٹرولیم مصنوعات پر اضافی ٹیکس کا نوٹیفکیشن مانگ لیا

COLOMBO:
سپریم کورٹ نے بجٹ منظوری سے پہلے ہی جی ایس ٹی وصولی پر لیے گئے از خودنوٹس کیس کی سماعت آج تک ملتوی کردی اور پٹرولیم مصنوعات پر لگائے گئے اضافی ٹیکس کا نوٹیفکیشن طلب کرلیا ہے۔

چیف جسٹس نے کہا ہم اس کیس کو ترجیحی بنیادوں پر سننا چاہتے ہیں، وقت کی کمی کے باعث بدھ کوتفصیل سے کیس کو سنیں گے۔اوگرا کے وکیل سلمان اکرم راجہ نے عدالت کو بتایا کہ دو فیصد اضافی جی ایس ٹی غیر رجسٹرڈ پٹرول پمپوں سے وصول کیا گیا ،غیر رجسٹرڈ پٹرول پمپوں سے17 فیصدکے بجائے19فیصد ٹیکس وصول کرنے کا فیصلہ کیاگیا تھا جو واپس لے لیا گیا اس کیلیے قانون میں ترمیم کی گئی تھی۔




غیر رجسٹرڈ پٹرول پمپوں سے دو فیصد جی ایس ٹی کا نوٹیفکیشن اوگرا نے واپس نہیں لیا بلکہ حکومتی سطح پر فیصلہ ہوا ہے ، عدالت نے مزید سماعت آج تک ملتوی کردی۔ لوڈشیڈنگ کے حوالے سے لیے گئے ازخودنوٹس کیس میں اٹارنی جنرل منیر اے ملک نے جواب داخل کرادیا ہے۔ چیف جسٹس نے کہا کہ یہ عوامی اہمیت کا کیس ہے اس کو ترجیحی بنیادوں پر سنا جائے گا ۔این این آئی کے مطابق اس کیس میں سپریم کورٹ نے پٹرولیم مصنوعات پر اضافی ٹیکس لگانے کا نوٹیفکیشن طلب کر لیا ہے۔