مذاکرات ناکام ہوئے تو پھر طالبان کو قطر میں اپنا سیاسی دفتر بھی بند کرنا ہوگا جان کیری

امریکی وزیر خارجہ جان کیری نے کہا ہے کہ طالبان سے مذاکرات ناکام ہوئے تو پھر اسے قطر میں اپنا سیاسی دفتر بھی بند کرنا ہوگا۔

امریکی وزیر خارجہ نے كہا كہ ابھی وہ یہ بات وثوق سے نہیں کہہ سکتے کہ افغان طالبان سے تعطل کا شکار ہونے والا مذاکراتی عمل دوبارہ شروع ہو بھی پائے گا یا نہیں تاہم اگر مذاکرات ناکام ہوئے تو پھر طالبان کو بھی قطر میں کھولا گیا اپنا سیاسی دفتر بند کرنا ہوگا۔ انہوں نے کہا کہ امریکا کو افغان طالبان سے مذاكرات درست سمت میں ہونے اور ان كا نتیجہ مفاہمت كی صورت میں نكلنے كی امید ہے۔

واضح رہے کہ طالبان نے امریکا سے امن مذاکرات شروع کرنے کے حوالے سے قطر کے دارالحکومت دوحہ میں اپنا سیاسی دفتر کھولا تھا جس پر افغان صدر حامد کرزئی نے طالبان کے جھنڈے اور ان کی جانب سے لگائی گئی تختی جس پر ''اسلامی امارات افغانستان'' لکھا تھا اس پر امریکا سے اپنے تحفظات کا اظہار کیا تھا جس کے بعد مذاکرات تعطل کا شکار ہوگئے تھے۔