پی سی بی نے آئی سی سی کے انٹرنیشنل امپائر پینل کیلئے 3 نام بھجوادیئے
گورننگ بورڈ کی منظوری کے بعد انٹرنیشنل امپائرپینل کیلئے احسن رضا،شوزب رضا اور ضمیر حیدر کے نام آئی سی سی کو بھجوائےگئے
آئی سی سی کے 15جولائی کو ہونے والے اجلاس میں آئندہ سال کے لیے امپائرز کی تقرریاں کی جائیں گی
پی سی بی نے آئی سی سی کے انٹرنیشنل پینل کے لیے 3 امپائروں کے نام بھجوانے کا فیصلہ کیا ہے۔
ایکسپریس نیوز کے مطابق پی سی بی نے گورننگ بورڈ کی منظوری کے بعد انٹرنیشنل امپائر پینل کے لئے احسن رضا، شوزب رضا اور ضمیر حیدر کے نام آئی سی سی کو بھجوادیئے ہیں، ضمیر حیدر جو پہلے فیلڈ امپائر تھے اب ان کا نام ٹی وی امپائر کے لیے بھیجا گیا جب کہ شوزب رضا کو ترقی دے کر ٹی وی امپائر سے فیلڈ امپائر کے لئے نامزد کیا گیا اور احسن رضا بدستور فیلڈ امپائر کی ذمہ داریاں نبھاتے رہیں گے۔
واضح رہے کہ آئی سی سی کے 15جولائی کو ہونے والے اجلاس میں آئندہ سال کے لیے امپائرز کی تقرریاں کی جائیں گی جب کہ اجلاس میں پاکستان کی نمائندگی ذاکر خان کریں گے۔