پارٹی اور قیادت کیخلاف ہر سازش ناکام بنائیں گے وزیراعلیٰ سندھ

وزیراعلیٰ سندھ سید مراد علی شاہ کا کہنا ہے کہ پارٹی اور قیادت کےخلاف ہر سازش ناکام بنائیں گے۔

کراچی بار میں شہید ذوالفقار علی بھٹوکی 91ویں ساگرہ تقریب سے خطاب کرتے ہوئے وزیراعلیٰ سندھ سید مراد علی شاہ کا کہنا تھا کہ شہید ذوالفقار علی بھٹونے 1973ء کا آئین دیا، ملک کو ایٹمی قوت بنایا، ان کے فیصلوں کو سمجھنا ہے تو غریبوں، مظلوموں اور عوام کے ساتھ بیٹھنا ہوگا جب کہ ہم وکلاء کے مسائل حل کریں گے۔


مراد علی شاہ نے کہا کہ شہید ذوالفقارعلی بھٹونے تھر کی زمین ہندوستان سے واپس لی اور آج وہاں کوئلے کی شکل میں سونا نکل رہا ہے، یہ شہید ذوالفقارعلی بھٹوتھا جس نے چین کے ساتھ مضبوط دوستی کی بنیاد رکھی۔ انہوں نے کہا کہ پارٹی کارکنوں نے جمہوریت کیلئے اپنی جانوں کا نذرانہ پیش کیا، پیپلزپارٹی ہمیشہ کورٹ کچہریوں کے چکر لگاتی رہی ہے، آصف زرداری کا معاملہ عدالت میں ہےکچھ نہیں کہوں گا تاہم پارٹی اور قیادت کے خلاف ہر سازش ناکام بنائیں گے۔