500 عمارتیں گرانے کے عدالتی حکم پر عملدرآمد روکا جائے میئر کراچی

میئر کراچی وسیم اختر نے سندھ حکومت سے اپیل کی ہے کہ عمارتیں گرانے سے متعلق سپریم کورٹ کے احکامات پر عمل درآمد کو روکا جائے اور فیصلے کے خلاف نظر ثانی اپیل دائر کی جائے۔

کراچی میں پریس کانفرنس کرتے ہوئے وسیم اختر نے کہا کہ سپریم کورٹ کی جانب سے شہری حکومت کو فٹ پاتھ اور نالوں پر کارروائی کا آرڈر تھا جو ہم نے پورا کیا، اب میں سندھ حکومت سے التماس کرتا ہوں کہ 500 عمارتیں انہدام کرنے کے حکم نامے پر عملدرآمد روکا جائے، چیف جسٹس اس عدالتی فیصلے پر نظر ثانی کریں۔

یہ بھی پڑھیں: کراچی میں شادی ہال مالکان کا کل سے ہڑتال کا اعلان


میئر کراچی نے کہا کہ سپریم کورٹ کی جانب سے شادی ہالز کو مسمار کرنے کا کہا گیا ہے لیکن شہریوں کی بکنگ ہوئی ہے، لوگوں کے بچوں کی شادیاں ہونی ہیں جب تک متبادل جگہ نہ فراہم کی جائے تب تک کارروائی نہیں کی جائے گی، سندھ حکومت سپریم کورٹ کے فیصلے کے خلاف نظرثانی اپیل کرے، اگر 525 کچی آبادیاں اور گوٹھ اسکیم ریگولرائز ہو سکتی ہیں تو یہ مسئلہ کیوں نہیں حل ہو سکتا۔

یہ بھی پڑھیں: کراچی کی کم از کم 500 عمارتیں گرانا ہوں گی، سپریم کورٹ

میئر کراچی نے اعلان کیا کہ رہائشی بلڈنگ اور شادی ہال نہیں توڑیں گے، یہ تجاوزات میں نہیں ہیں بلکہ ان کی زمین منتقلی کا مسئلہ ہے البتہ غیر قانونی شادی ہالز کو توڑا جائے گا۔