اوگرا کیس ایف آئی اے کا خفیہ اکائونٹس ریکارڈ پر لانے سے گریز

سابق چیئرمین اوگرا توقیرصادق کیخلاف 82 ارب روپے کے کرپشن اسکینڈل میں ایف آئی اے تحقیقات کے دوران بیرون ملک خفیہ اکائونٹس اورکروڑوں روپے کی ترسیل کے انکشافات کے باوجود ثبوت ریکارڈپر لایا نہ ملزمان کو شامل تفتیش کیا جبکہ بیرون ملک اکائونٹ کومنجمدکرانے کی بھی سفارش نہیں کی گئی۔

چند روز قبل نیب کی تفتیش میں پول کھل گیا، ذرائع کاکہناہے کہ توقیر صادق نے ایک رشتے دارکے نام پر اپناخفیہ اکائونٹ کھول رکھاہے جس میں ان کی جانب سے11کروڑروپے جمع کرانے کے ثبوت نیب کومل گئے ہیں۔ اکائونٹ منجمدکرانے کیلیے بین الاقوامی قوانین کے مطابق حکومت پاکستان نیب کی سفارش پر یواے ای حکومت کوخط لکھے گی۔




نیب کویواے ای کے متعلقہ بنک کو ٹھوس شواہد پیش کرناہونگے تاکہ یہ رقم پاکستان منتقل کی جاسکے۔ ذرائع نے بتایاکہ 27 کروڑروپے سے زائدرقم کی ترسیل کے ثبوت قبل ازیں ایف آئی اے کی تفتیش میں بھی سامنے آئے مگر اسے مبینہ طورپر نامعلوم وجوہات کی بناپر ریکارڈپرنہ لایا گیا۔ ذرائع کے مطابق توقیرصادق کے 2رشتے داروں کواکائونٹس میں مذکورہ رقم کی ترسیل کے ثبوت ملنے کے بعدبھی ملزمان کوشامل تفتیش نہیں کیا گیا۔