پاکستان کی فضائی حدود جزوی طور پر بحال

سول ایوی ایشن نے ابتدائی طور پر 4 ہوائی اڈوں سے ملکی فضائی حدود بحال کردیں تاہم لاہور، فیصل آباد، ملتان، سیالکوٹ ایئر پورٹ 4 مارچ تک بند رکھنے کا فیصلہ کیا گیا ہے۔

ایکسپریس نیوز کے مطابق سول ایوی ایشن ہیڈ کوارٹر میں فضائی حدود کھولنے سے متعلق اہم اجلاس ہوا جس میں ابتدائی طور پر ملک کے 4 ہوائی اڈوں سے پروازیں چلانے پر غور کیا گیا اور لاہور، فیصل آباد، ملتان، سیالکوٹ ایئر پورٹ 4مارچ تک بند رکھنے کا فیصلہ ہوا ہے۔


ذرائع کے مطابق ابتدائی طور پر کراچی، اسلام آباد ، کوئٹہ اور پشاور سے پروازیں بحال کی جائیں گی اور ایران اور مسقط کے راستے آنے والی پروازوں کو آمدورفت کی اجازت ہوگی البتہ مغربی روٹ سے آنے والے طیاروں کو پاکستانی ہوائی اڈوں پر اترنے کے حوالے سے فیصلہ بعد میں کیا جائے گا۔

سول ایوی ایشن ذرائع کا کہنا ہے کہ کراچی سے یوکرین اور سعودی ایئر لائن کی دو پروازوں کو گزرنے کی اجازت دی گئی، یوکرائن ایئرلائن کی پرواز پی ایس 392 نیو دہلی سے کیو بورسپل ایئرپورٹ یوکرائن جا رہی ہے اور سعودی ایئر لائن کی پرواز 6266 کولمبوسے ماسکو جا رہی ہے، دونوں غیر ملکی پروازیں اس وقت نواب شاہ اور کراچی کے علاقوں سے گزر رہی ہیں۔