نیشنل ایکشن پلان مسلم لیگ ن کی کاوشوں کا نتیجہ ہے شہبازشریف

قومی اسمبلی میں اپوزیشن لیڈر شہبازشریف کا کہنا ہے کہ نیشنل ایکشن پلان مسلم لیگ نون کی کاوشوں کا نتیجہ ہے۔

ایکسپریس نیوزکے مطابق پارلیمنٹ میں قائد حزب اختلاف شہباز شریف نے نیشنل ایکشن پلان پر عمل درآمد کے حوالے سے وزیرخارجہ شاہ محمود قریشی کے خط کا جواب دے دیا ہے۔


شہبازشریف نے اپنے خط میں کہا ہے کہ نیشنل ایکشن پلان مسلم لیگ (ن) کی کاوشوں کا نتیجہ ہے، (ن) لیگ نے ہی پارلیمانی فورم پر تمام سیاسی قیادت کو متحد کیا اور اپنے دور حکومت میں ملک سے دہشت گردی کے خاتمے کے لیے نیشنل ایکشن پلان پر عمل کے لیے تمام سیاسی پارٹیوں کو متحرک کیا۔

خط میں کہا گیا ہے کہ ہمارے دور میں بھی پارلیمانی بحث و تمحیص کے بعد قومی اتفاق رائے کا حصول ممکن ہوا، اور موجودہ حالات میں پوری اپوزیشن پاکستان بھر کی سیاسی جماعتوں کے رائے سے فیصلہ سازی چاہتی ہے، شاہ محمود قریشی کی جانب سے مجوزہ بریفنگ قومی اسمبلی میں دی جانی چاہیے، اور قومی اسمبلی میں بریفنگ سے تمام سیاسی قوتوں کی مجموعی دانش سے فائدہ اٹھایا جا سکتا ہے۔