بہن صائمہ اور سید نور مجھے انڈسٹری سے دور رکھنا چاہتے ہیں سنہری

فلم اسٹار صائمہ کی چھوٹی بہن ہونے کا دعویٰ کرنیوالی اورابھرتی ہوئی اداکارہ سُنہری نے کہا ہے کہ ان کی بڑی بہن اوربہنوئی معروف ہدایتکار سید نوران کے شوبزمیں کام کرنے میں سب سے بڑی رکاوٹ ہیں۔

میں اپنی محنت اورلگن سے تمام رکاوٹوں کوعبورکرتے ہوئے سٹیج ، ٹی وی اورفلم کی دنیا میں منفرد پہچان بنائوں گی۔ ان خیالات کااظہارسُنہری نے گزشتہ روزڈیفنس میں واقع اپنی رہائشگاہ پر میڈیا سے گفتگوکرتے ہوئے کیا۔ اس موقع پر فلم اسٹار صائمہ کی بڑی بہن یاسمین، بہنوئی سعید بھٹی اورپروموٹرمختاربھی موجود تھے۔ سنہری کا کہنا تھا کہ وہ فلموںمیںکام کرنے کاارادہ رکھتی ہیں لیکن ان کے بہنوئی سیدنور اوربہن انہیں فلم انڈسٹری سے دوررکھنا چاہتے ہیں۔ باقاعدہ رقص کی تربیت بھی حاصل کررہی ہوں۔ انھوں نے بتایاکہ وہ ان دنوں الفلاح تھیٹرمیں پروڈیوسر ارشدچوہدری کے ڈرامہ میں اہم کردار ادا کررہی ہیں۔




سنہری نے ایک سوال کے جواب میں کہا کہ ان کے بہنوئی سیدنوراپنی فلموں میں کام کرنے کا موقع نہیں دیتے حالانکہ وہ مختلف تقاریب میں اعلان کرتے ہیں کہ وہ نئے ٹیلنٹ کو پروموٹ کرتے ہیں۔ جب وہ اپنے گھر کے ہی ٹیلنٹ کوپروموٹ نہیں کرتے تووہ دوسروں کوکیا کرینگے؟۔ اس موقع پرصائمہ اورسنہری کی بڑی بہن کے شوہرسعیدبھٹی نے کہا کہ آج سے کئی سال پہلے انھوں نے صائمہ کیلیے کام کیا اورصائمہ کو فلم اسٹار بنانے میں ان کا اہم کردار ہے۔ آج وہ ایک بارپھرسنہری کی شکل میں شوبزکی دنیا کوایک نیا چہرہ دے رہے ہیں۔ سعیدبھٹی کاکہنا تھا کہ سید نوراصل میںٹیلنٹ کے دشمن ہیں اورانھوںنے کبھی بھی سوائے صائمہ کے کسی کوآگے آنے کا موقع نہیں دیا۔ انھوں نے کہا کہ ''سیدنورصائمہ کا بیگ اٹھا کرپھرتے تھے اورجلد ہی وہ سنہری کا بیگ بھی اٹھائے دکھائی دینگے''۔