امریکا کا پاک افغان فنڈ میکسیکو سرحدی دیوار کی تعمیر میں استعمال کرنے کا فیصلہ

امریکی صدر ڈونلڈ ٹرمپ نے پاکستان اور افغانستان کے لیے مختص ایک ارب پچاس کروڑ ڈالر کا فنڈ میکسیکو سرحد پر دیوار کی تعمیر میں استعمال کرنے کا فیصلہ کیا ہے۔

غیر ملکی خبر رساں ادارے کے مطابق امریکی صدر ڈونلڈ ٹرمپ نے اپنے صوابدیدی اختیارات استعمال کرتے ہوئے میکسیکو سرحد پر دیوار کی تعمیر کے لیے پاکستان اور افغانستان کے لیے مختص ایک ارب پچاس کروڑ ڈالر کا فنڈ استعمال کرنے کا فیصلہ کیا ہے۔ امریکی صدر نے یہ فیصلہ کانگریس کی جانب سے دیوار کی تعمیر کے لیے صدر کو مطلوب فنڈ نہ دینے کے بعد کیا گیا۔


امریکا کے قائم مقام سیکریٹری دفاع پیٹرک شنہان کے مطابق میکسیکو کی سرحد پر دیوار کی تعمیر کے لئے ایک ارب پچاس کروڑ ڈالر مختص کیے گئے ہیں اور یہ رقم امریکا کی جانب سے مختلف پروگرامز کے لیے مختص فنڈ سے لی جائےگی، افغان سیکیورٹی فورسز کے فنڈ کے لیے مختص رقم میں سے 60 کروڑ ڈالر جب کہ پاکستان کے لیے مختص کوالیشن سپورٹ فنڈ سے بھی رقم لی جائےگی۔

واضح رہے کہ صدر ٹرمپ نے امریکا میں مہاجرین کی آمد کو روکنے کے لیے میکسیکو کی سرحد پر حفاظتی دیوار کی تعمیر کا متنازع فیصلہ کیا تھا جس پر انہیں عالمی سطح پر بھی تنقید کا نشانہ بنایا گیا تھا اور کانگریس نے بھی مخالفت کی تھی۔ کانگریس کی جانب سے فنڈز کی منظوری نہ دینے پر امریکی صدر نے ملک میں ایمرجنسی بھی نافذ کردی تھی۔