کراچی عدالت نے سفاری پارک پولیس مقابلے کے چاروں ملزمان کو جوڈیشل ریمانڈ پر جیل بھیج دیا

انسداد دہشت گردی کی عدالت نے سفاری پارک پولیس مقابلے کے 4 ملزمان کو 12 ستمبر تک جوڈیشل ریمانڈ پر جیل بھیج دیا ہے۔


ایکسپریس نیوز کے مطابق انسداد دہشت گردی کی خصوصی عدالت نمبر ایک میں سفاری پارک پولیس مقابلے کی سماعت کے دوران چاروں ملزمان احمر، عمران، اللہ ورایو اور رانجن کو جسٹس بشیر کھوسو کے روبرو پیش کیا گیا جہاں پولیس نے ملزمان کے جسمانی ریمانڈ کی استدعا کی تاہم عدالت نے پولیس کی استدعا کو مسترد کرتے ہوئے چاروں ملزمان کو 12 ستمبر تک جوڈیشل ریمانڈ پر جیل بھیج دیا اور تفتیشی افسر کو آئندہ سماعت پر چالان پیش کرنے کا حکم دیا۔

واضح رہے کہ 15 اگست کو سفاری پارک میں پولیس مقابلے میں ملزمان کی فائرنگ سے ڈی ایس پی گلشن اقبال قاسم غوری اور اے ایس آئی آصف محمود اور ایک کانسٹیبل جاں بحق جبکہ ایس ایچ او بہادر آباد انسپکٹر حیدر زیدی سمیت متعدد پولیس افسران و اہلکار زخمی ہوگئے تھے جس کے بعد پولیس نے آپریشن کرکے 9 ملزمان کو گرفتار کیا تھا تاہم 5 ملزمان کے خلاف شواہد نہ ملنے پر انہیں رہا کردیا گیا تھا۔