جناح اسپتال NICVD اور NICH کیلیے بجٹ مختص نہیں کیا

صوبائی حکومت نے رواں مالی سال کے بجٹ 2019,20 میں جناح اسپتال، قومی ادارہ امراض قلب اور قومی ادارہ اطفال برائے صحت تینوں اسپتالوں کے لیے بجٹ کتاب میں کوئی رقم مختص نہیں کی۔

حکومت سندھ کے ذرائع کا کہنا ہے کہ وزیر اعلی سندھ نے Block ایلوکیشن کے نام پر تینوں اسپتالوں کیلیے بجٹ مختص کیا ہے۔ ' بلاک ' ایلوکیشن تکنیکی لفظ ہے جو وزیر اعلی سندھ کے صوابدیدی اختیارات کے تحت بعد میں اسپتالوں کو منتقل کیاجاسکتا ہے کیونکہ ابھی تک ان تینوں اسپتالوں کے بارے میں غیر یقینی اور غیر واضح صورتحال کا سامنا ہے۔


وفاقی حکومت نے 22 مئی2019کونوٹیفیکیشن جاری کرتے ہوئے کہا ہے کہ تینوں اسپتالوں کو وفاق کے کنٹرول میں دیدیا تھا، ادھر حکومت سندھ کا کہنا ہے کہ وفاق نے صوبائی حکومت سے مشاورت کے بغیر جناح اسپتال، امراض قلب اورقومی ادارہ اطفال (این آئی سی ایچ)کواپنے کنٹرول میں لے لیاجس کے بعد حکومت سندھ نے اس نوٹیفیکیشن پر اعتراض بھی کیا اورآج (جمعہ) کوبجٹ اجلاس کے دوران وزیراعلی سندھ نے ایک بار پھر اعتراض کیا۔

ادھر ان تینوں اسپتالوں کے حوالے سے صورتحال مزید ابہام اورغیر یقینی کا شکار ہے جس کی وجہ سے ان اسپتالوں کی انتظامیہ اور ملازمین بھی تذبذب اور ابہام کا شکار ہیں جس کی وجہ سے صحت کی فراہمی بھی متاثر ہورہی ہے۔