پولیس کی کارروائی27ملزمان گرفتاردستی بم اور منشیات برآمد

پولیس نے شہر کے مختلف علاقوں میں کارروائی کرتے ہوئے27ملزمان کو گرفتار کرکے ان کے قبضے سے اسلحہ ، دستی بم ، اور منشیات برآمد کرلی، تفصیلات کے مطابق شرافی گوٹھ پولیس نے الفلاح بند پر کارروائی کرتے ہوئے 2 ملزمان خان عرف شیرا اور سعید خان کو گرفتار کے ان کے قبضے سے2 ٹی ٹی پستول اور ایک روسی ساختہ دستی بم برآمد کر لیا۔

سرسید ٹائون پولیس نے نارتھ کراچی میں اسنیپ چیکنگ کے دوران2ملزمان رفیق اور عظمت کو گرفتار کرکے ان کے قبضے سے منشیات اور ایک ٹی ٹی پستول برآمد کر لی ، عید گاہ پولیس نے پرانا حاجی کیمپ ٹمبر مارکیٹ کے قریب رکشے کو روک کر تلاشی کے دوران 2 ملزمان عبدالطیف اور داد محمد کو گرفتار کرکے ان کے قبضے سے ایک سب مشین گن اور ایک ٹی ٹی پستول برآمد کر لی ۔




پولیس کے مطابق مذکورہ ملزمان لیاری گینگ وار کے کارندے ہیں ، آرام باغ پولیس نے اردو بازار کے علاقے میں دکانداروں سے لوٹ مار کرنے والے 2 ملزمان فرحان اور ثنا اﷲ کو گرفتار کرکے ان کے قبضے سے اسلحہ، مسروقہ سامان اور نقدی برآمد کرلی ، بلدیہ ٹاؤن پولیس نے غازی ٹاؤن سے2 ملزمان عمران عرف ہیلی کاپٹر اور شیر زمین کو گرفتار کر کے ان کے قبضے سے اسلحہ برآمد کر لیا جبکہ پولیس نے دیگر علاقوں سے 15 ملزمان کو گرفتار کر کے ان کے قبضے سے اسلحہ برآمد کرنے کا دعویٰ کیا ہے ۔