کچھ بااثر طبقے طالبان سے مذاکرات سبوتاژ کرنا چاہتے ہیں نثار

وزیر داخلہ چوہدری نثار نے کہا ہے کہ ان کے سامنے کچھ ایسی باتیں آئی ہیں جس سے یہ شواہد ملتے ہیں کہ کچھ با اثر طبقے اور قوتیں آل پارٹیز کانفرنس کی طرف سے پاکستانی طالبان سے مذاکرات کے ذریعے امن کی کوششوں کو سبوتاژ کرنا چاہتے ہیں۔

ایک ٹی وی کے مطابق وفاقی وزیر نے خصوصی بات چیت کرتے ہوئے کہا کہ امریکا افغانستان میں 12 سال تک طاقت کے استعمال کے بعد طالبان سے امن کیلیے مذاکرات کررہا ہے تو پاکستان کیوں نہیں کرسکتا۔ انہوں نے کہا کہ برطانوی حکومت شام کے خلاف فوجی کارروائی پر آمادہ ہے لیکن اسکی پارلیمنٹ نے اسے مسترد کر دیا تو کیا ہم اس معاملے کو سرینڈر کہیں گے؟۔




امن اور خیر کی راہ تلاش کرنا کون سا جرم یا گناہ ہے کہ مذاکرات کی مخالفت کی جا رہی ہے۔ گذشتہ 12 سال کی لڑائی اور جنگ سے کیا حالات میں بہتری آئی ہے کہ اب مذاکرات کے مخالفین اور ناقدین ہمیں پھر جنگ کی طرف دھکیلنا چاہتے ہیں۔ وزیر داخلہ نے کہا کہ ناقدین آل پارٹیز کانفرنس کے فیصلوں پر تنقید کا پورا حق رکھتے ہیں مگر انھیں یہ حق حاصل نہیں کہ قوم کی سیاسی و عسکری قیادت کے فیصلوں کی توہین کریں۔