لاہورکے لنڈا بازار میں لگنے والی آگ نے تباہی مچادی میٹروبس سروس بھی معطل

جنرل اسپتال کے قریب واقع لنڈا بازار میں لگنےوالی آگ سے کروڑون روپے کا قیمتی سامان جل کر خاکستر ہو گیا ہے جب کہ آگ کی وجہ سے میٹروبس سروس بھی معطل کردی گئی۔


ایکسپریس نیوز کے مطابق لنڈا بازار میں اب تک 80 سے زائد دکانیں، ٹھیلے اور لاکھوں روپے کا قیمتی سامان بھی جل کر خاکستر ہو گیا ، آگ کی شدت اس قدر زیادہ تھی کہ اس نے مزید درجنوں دکانوں اور رہائشی علاقے کو بھی اپنی لپیٹ میں لے لیا جب کہ امدادی ٹیمیں اور فائربریگیڈ کےعملے نے کئی گھنٹوں کی محنت کے بعد آگ پر قابو پایا۔ بعض ذرائع کا کہنا ہے کہ آگ سے اب تک کروڑوں روپے کا نقصان ہو چکا ہے۔

دوسری جانب آگ لگنے کی وجہ سے قینچی چوک سے چونگی امرسدھو کے مقام تک روڈ کو ٹریفک کے لیے بند کر دیا گیا ہے جس کی وجہ سے ارد گرد کی سڑکوں پرگاڑیوں کی لمبی قطاریں لگ گئی جب کہ امرسدھو سے گجومتہ تک میٹروبس سروس بھی بند کردی گئی۔