پاکستان سے تعلقات بہتری کی جانب بڑھ رہے ہیں بھارتی وزیراعظم

بھارتی وزیراعظم منموہن سنگھ نے کہا ہے کہ پاکستان کے ساتھ تعلقات میں بہتری کے لئے لائن آف کنٹرول پر امن قائم ہونا ضروری ہے۔

امریکا سے بھارت واپسی پر بھارتی وزیراعظم منموہن سنگھ نے سماجی رابطے کی ویب سائٹ ٹوئٹر پرلکھا کہ نیویارک میں پاکستانی وزیراعظم نواز شریف سےملاقات مفید رہی اور پاکستان کے ساتھ تعلقات بہتری کی جانب بڑھ رہے ہیں۔


بھارتی وزیر اعظم نے اپنے پیغام میں کہا کہ نواز شریف پاکستان کےجمہوری طور پهر منتخب وزیراعظم ہیں اور انہوں نے دونوں ممالک کے تعلقات کے حوالے سے تمام باتیں صحیح سمت میں کی ہیں، دونوں ممالک کے تعلقات بہتر بنانےکے لئے مثبت تبادلہ خیال ہوا۔

واضح رہے کہ اتوار کے روز نیو یارک میں وزیراعظم نواز شریف اور ان کے بھارتی ہم منصب کے درمیان ملاقات ہوئی، ملاقات میں دونوں وزرائے اعظم نے تعلقات کو مثبت سمت میں آگے بڑھانےاور امن عمل کو فروغ دینے کے لئے مذاکرات پر زور دیا، ملاقات میں دونوں ممالک کے ڈی جی ایم اوز کو ذمہ داری سونپی گئی کہ وہ لائن آف کنٹرول پر کشیدگی کم کرنے کے لئے اقدامات اٹھائیں۔