طالبان سے مذاکرات فضل الرحمن کی سربراہی سے معذرت

وزیرداخلہ چوہدری نثار علی خان نے کہا ہے کہ بہت جلد طالبان سے مذاکرات کیلیے طریقہ کارکا اعلان کردیاجائیگا۔

ان خیالات کا اظہار انھوں نے گزشتہ روز جے یوآئی کے سربراہ مولانا فضل الرحمن سے ملاقات میں کیا۔ مولانا فضل الرحمن کے ترجمان کے مطابق جے یوآئی کے سربراہ نے طالبان سے بات چیت کے حوالے سے حکومت کی جانب سے ہوم ورک پر اطمنان کااظہارکیا۔ وزیر داخلہ انھیں اب تک کی پیشرفت سے آگاہ کیا۔ مولانا فضل الرحمن نے کہاکہ حکومت طالبان کو پیغام دے کہ حکومت ان سے مذاکرات کرنے میں سنجیدہ ہے۔




اس سلسلے میں جمعیت علماء اسلام حکومت کے ساتھ مکمل تعاون کرے گی ۔ آن لائن کے مطابق وزیرداخلہ نے مولانا فضل الرحمان کو مذاکراتی ٹیم کا سربراہ بننے کی پیش کش کی جس پر مولانا نے معذرت کرتے ہوئے کہا کہ مذاکرات کیلیے پہلے جامع حکمت عملی بنائی جائے ، ایجنڈا واضح اور طریقہ کار طے کیا جائے ، مذاکراتی عمل میں سول اور عسکری قیادت کو بھی شامل کیا جائے۔