بھارتی ریاست آندھرا پردیش میں 8 افراد ٹرین کی زد میں آکر ہلاک

بھارتی ریاست آندھرا پردیش کے ایک ریلوے اسٹیشن پر ٹرین کی زد میں آکر 8 افراد ہلاک جبکہ 20 سے زائد زخمی ہوگئے۔

بھارتی میڈیا کے مطابق ریاست آندھرا پردیش کے ضلع وزیاناگرام کے گوٹلام ریلوے اسٹیشن پر کھڑی ٹرین چلنے ہی لگی تھی کہ اس میں آگ لگنے کی افواہ پھیل گئی اور لوگوں نے ٹرین سے اترنا شروع کردیا اسی اثنا میں کئی مسافر مخالف سمت میں آنے والی ٹرین کی زد میں آگئے، حادثے کے نتیجے میں 8 افراد موقع پر ہی ہلاک جبکہ 20 سے زائد زخمی ہوگئے، حادثے میں ہلاک ہونے والوں کی لاشیں بہت دیر تک ٹریک پر پڑی رہیں تاہم بعد میں امدادی کارکنوں اور پولیس اہلکاروں نے لاشوں اور زخمیون کو اسپتال منتقل کیا۔

واضح رہے کہ بھارت میں ہر سال ٹرین حادثوں میں ہشزاروں افراد ہلاک اور زخمی ہوجاتے ہیں گزشتہ برس اسی نوعیت کے حادثات میں 15ہزار افراد اپنی جان سے ہاتھ دھوبیٹھے تھے۔