لاہورایئرپورٹ پر چینی مسافر کی حالت غیر کورونا وائرس کے شبے پر اسپتال منتقل

ایئرپورٹ کے لاؤنج میں بیٹھے چینی مسافر کے ناک سے اچانک خون نکل آیا جس کے باعث مسافر کو آئسولیشن روم سے فوری اسپتال منتقل کر دیا گیا۔

سول ایوی ایشن ذرائع کے مطابق چینی مسافر پی آئی اے کی پرواز 313 کے ذریعے کراچی سے لاہور پہنچا، جہاں سے وہ چینی شہر ارومچی جانا چاہتا تھا لیکن چین کے لئے پرواز نہ ہونے کے باعث ایئرپورٹ لاؤنج میں بیٹھا ہوا تھا کہ اچانک مسافر کی ناک سے خون بہنا شروع ہوگیا۔

مسافر کی حالت بگڑنے کے بعد ایئرپورٹ پر محکمہ صحت کے عملے کی دوڑیں لگ گئیں، چینی مسافر ڈیمنگ یاوکو فوری طور پر آئسولیشن روم لے جایا گیا۔




بعد ازاں مسافر کو ایمبولینس کے ذریعے سروسز اسپتال منتقل کر دیا گیا۔ ایوی ایشن ذرائع کا کہنا ہے کہ کورونا وائرس کے مشتبہ مسافر کی مکمل اسکریننگ کی جائے گی۔