کراچی میں گیس میٹرز کو تالے لگا کر لوگوں کو لوٹنے والا گروہ سرگرم

شہر قائد کےعوام کو نئے انداز سے لوٹنے والا ایک گروہ سرگرم ہوگیا جو سوئی گیس کا نمائندہ بن کر گیس میٹرز کو تالے لگاتا ہے اور کھولنے کے عوض ہزاروں روپے وصول کرتا ہے۔

ذرائع نے بتایا کہ یہ منظم گروہ مختلف علاقوں میں رات کے اوقات میں کارروائی کررہا ہے، گروہ میٹر پر تالے لگا کر اپنے موبائل نمبر کی پرچی چسپاں کردیتا ہے اور متاثرہ صارف کے رابطہ کرنے پر ایزی پیسہ کے ذریعے رقم کی ادائیگی کی ہدایت کی جاتی ہے۔



سوئی سدرن گیس کمپنی کے حکام نے ایکسپریس کو بتایا کہ گیس میٹروں پر تالے لگائے جانے کی سب سے زیادہ شکایات ملیر اور شاہ فیصل کالونی سے موصول ہوئیں حالاں کہ ایس ایس جی سی کی جانب سے ایسا کوئی آپریشن نہیں کیا جارہا، ایس ایس جی سی انتظامیہ نے اپنے تھانے میں اس حوالے سے شکایات درج کرا رکھی ہیں۔




ترجمان نے بتایا کہ ایس ایس جی سی کی ٹیم نادہندگان کے خلاف دن میں کارروائی کرتی ہے اور ٹیم صارفین کا دروازہ کھٹکھٹانے کے بعد ان سے ادا شدہ گیس بل طلب کیا جاتا ہے جس کے بعد تادیبی کارروائی عمل میں لائی جاتی ہے۔



ترجمان نے ایس ایس جی سی صارفین کو دھوکے بازوں سے ہوشیار رہنے کی ہدایت دیتے ہوئے کہا کہ ایسی دھوکے باز کارروائی کی صورت میں صارفین فوری طور پر ایس ایس جی سی کے ٹول فری نمبر 1199 پر شکایت درج کرائیں۔