حکومت نے ایک اور مہنگائی بم گراکر بجلی کی قیمت میں 73 پیسے فی یونٹ اضافہ کردیا

نیشنل الیکٹرک پاور ریگولیٹری اتھارٹی (نیپرا) نے بجلی کی قیمت میں 73 پیسے فی یونٹ کا اضافہ کردیا تاہم کے ای ایس سی اور پیسکو کے صارفین پر اس کا اطلاق نہیں ہوگا۔


نیپرا کے مطابق سینٹرل پاور پرچیز ایجنسی کی جانب سے بجلی کی قیمتوں میں اضافے کے لئے درخواست دی گئی تھی، نیپرا کے وائس چیئرمین محمد نعیم نے درخواست کی سماعت کرتے ہوئےکمپنی کو نرخ بڑھانے کی اجازت دے دی، جس کے تحت بجلی کی قیمتوں میں اضافہ فیول ایڈجسٹمنٹ کی مد میں کیا گیا ہے تاہم نئی قیمتوں کا اطلاق کراچی الیکٹرک سپلائی کمپنی (کے ای ایس سی) اور پشاور الیکٹرک سپلائی کمپنی (پیسکو) کے علاوہ ملک میں بجلی کی تمام تقسیم کار کمپنیوں پر ہوگا۔

واضح رہے کہ رواں اور گذشتہ ماہ میں حکومت کی جانب سے عوام پر تیسری بار بجلی بم گرایا گیا ہے، اس سے قبل 23 اکتوبر کو بجلی کی فی یونٹ قیمت میں 32 پیسے جبکہ 11 اکتوبر کو بجلی کی قیمت میں 8 روپے فی یونٹ سے زائد کا اضافہ کیا گیا تھا۔