سندھ سمیت ملک بھر میں پولیو وائرس کے کیسز میں اضافہ

KARACHI:
سندھ سمیت ملک بھر میں پولیو وائرس کے کیسز میں اضافہ ہوگیا، سندھ میں رواں سال کا چھٹا پولیو وائرس کیس سامنے آگیا، ضلع کشمور کے رہائشی ڈھائی سالہ بچے میں پولیو وائرس کی تصدیق ہوگئی۔


انسداد پولیو سیل کے مطابق سندھ کے ضلع کشمور کے رہائشی ڈھائی سالہ بچے میں پولیو وائرس کی تصدیق ہوگئی، والدین کے مطابق متاثرہ بچے نے پولیو کی 7 خوراکیں لی ہیں مگر معمول کے حفاظتی ٹیکے نہیں لگوائے گئے، کراچی میں فروری کی انسداد پولیو مہم کے دوران 97.4 فیصد ہدف حاصل کرنے میں کامیاب ہوئے ہیں، قومی ای او سی اور سندھ ای او سی نے پولیو کے خاتمے کے لئے دوبارہ لڑائی شروع کر دی ہے۔

2020 کے دوسرے نصف حصے میں وائرس کی منتقلی کی شدت میں نمایاں کمی واقع ہو گی، رواں سال سندھ بھر میں پولیو وائرس کے کیسز کی تعداد6 ہوگئی جبکہ ملک بھر میں مجموعی طور پر 18 پولیو وائرس کے کیسز رپورٹ ہوچکے ہیں، واضح رہے کہ گذشتہ سال 2019 میں پولیو وائرس کے 144 کیس ملک بھر سے جبکہ سندھ سے30 کیسز رپورٹ ہوئے تھے۔