سانحہ راولپنڈی اچانک رونما ہوا یہ کسی منصوبہ بندی کا نتیجہ نہیں تھا سی پی او

KARACHI:
سی پی او راولپنڈی اختر لالیکا نے کہا ہے کہ سانحہ راولپنڈی میں ملوث 40 ملزمان کو شناخت کیا گیا ہے اوران میں سے 12 کو گرفتار کرلیا گیا ہے۔


راولپنڈی میں پریس کانفرنس کے دوران سی پی او اختر لالیکا نے کہا کہ سی سی ٹی وی کے ذریعے سانحہ راولپنڈی میں ملوث 40 ملزمان کی شناخت ہوگئی ہے جن میں سے 12 کو گرافتار کرلیا گیا ہے جبکہ باقی ملزمان کی تلاش کے لئے پولیس کا سرچ آپریشن جاری ہے، گرفتار ملزمان میں سے ایک کا تعلق آزادکشمیر سے ہے، انہوں نے کہا کہ سانحے کے وقت شر پسندوں نے پولیس سے 5 بندوقیں چھینی تھیں جن میں سے 2 برآمد کرلی گئی ہیں۔

سی پی او راولپنڈی نے کہا کہ یوم عاشور کے روز پیش آنے والا سانحہ کسی منصوبہ بندی کے تحت رونما نہیں ہوا، کچھ لوگ اکھٹے ہوئے اور اچانک حالات خراب ہوگئے، انہوں نے کہا کہ سانحہ راولپنڈی میں 11 افراد جاں بحق ہوئے لیکن جاں بحق ہونے والوں میں جامعہ تعلیم القرآن کا کوئی طالب علم شامل نہیں۔