ماں بیٹی بہن بیوی عورت ہر روپ میں رحمت خواتین کا عالمی دن منایا گیا

ماں، بہن، بیٹی، بیوی غرض عورت ہر روپ میں رحمت ہے، وجود زن سے ہے تصویرکائنات میں رنگ؛ پاکستان سمیت دنیا بھر میں خواتین کا عالمی دن منایا گیا، ملک بھر میں ریلیاں نکالی گئیں اور تقاریب کا انعقاد کیا گیا۔

عورت کائنات میں خدا کی ایسی تخلیق جس کے تصور سے نرمی، محبت، خلوص کا تصور ابھرتا ہے، بقول شاعر کائنات کی رنگینی کی وجہ بھی یہی وجود ہے، مردوں کے شانہ بشانہ چلتی خواتین کو ان کے حقوق، احترام دینے کے لیے 8 مارچ کو دنیا بھر میں عالمی یوم خواتین منایا جاتا ہے۔

1908ء میں نیویارک میں گارمنٹس فیکٹری میں کام کرنے والی خواتین ملازمین نے کام کی نوعیت کے خلاف احتجاج کرتے ہوئے ہڑتال کی اور اپنے حقوق تسلیم کرائے جس کے اعزاز میں دنیا میں پہلی بار یوم خواتین امریکا میں 28 فروری 1909ء کو منایا گیا۔

اس دن کو منانے کا اہتمام امریکا کی سوشلسٹ پارٹی نے کیا تاہم بعد میں اقوام متحدہ نے 1975ء میں باقاعدہ طور پر 8 مارچ کو عالمی یوم خواتین کے نام سے منسوب کردیا جس کے بعد سے آج تک ہر سال 8 مارچ کو دنیا بھر میں خواتین کے حقوق اجاگر کرنے کے لیے یہ دن منایا جاتا ہے۔

یہ خبر بھی پڑھیں: مغرب کی عورت شوہر کی وفاداری سے محروم ہو گئی ہے، سراج الحق


خواتین کے عالمی دن کے موقع پر پاکستان میں شہر شہر ریلیاں نکالی گئیں۔ اسی سلسلے میں ملک کے مختلف شہروں میں سول سوسائٹی کی جانب سے سیمینارز اور کانفرنسز کا بھی انعقاد کیا گیا۔

یہ خبر بھی پڑھیں: ''میرا جسم میری مرضی کہنے والی خواتین! سیکھو اس شہزادی سے''

خواتین کے عالمی دن پر گوگل کا خراج تحسین

دوسری جانب خواتین کے عالمی دن پر گوگل نے اپنا ''ڈوڈل'' تبدیل کر کے خواتین کو خراج تحسین پیش کیا۔ گوگل نے ڈوڈل کو ویڈیو کی صورت میں پیش کیا جس میں خواتین کی صلاحیتوں کو زندگی کے ہر شعبے میں اُجاگر کرتے ہوئے دکھایا گیا۔

https://youtu.be/gLM1-MOoalg