شہباز شریف کا زہریلا پروپیگنڈا کورونا سے زیادہ خطرناک ہے فیاض الحسن چوہان

وزیر اطلاعات پنجاب فیاض الحسن چوہان کا کہنا ہے کہ شہباز شریف کا زہریلا پروپیگنڈا کورونا وائرس سے زیادہ خطرناک ہے۔


اپنے بیان میں فیاض الحسن چوہان نے کہا کہ پنجاب حکومت نے شہباز شریف کو کھلے دل کے ساتھ خوش آمدید کہا تھا، ہمیں امید تھی کہ شہباز شریف کورونا کے خلاف حکومت کے شانہ بشانہ جدوجہد کریں گے لیکن افسوس کی بات ہے کہ انہوں نے وفاقی و صوبائی حکومت کے خلاف گلی محلے کی سیاست شروع کر دی۔

فیاض الحسن چوہان کا کہنا تھا کہ تمام ادارے بشمول فوج آرٹیکل 245 کے تحت مل کر کورونا کے خلاف برسرِ پیکار ہیں اور شہباز شریف ملکی اداروں پر کورونا سے متعلق اعداد و شمار چھپانے کا الزام لگا رہے ہیں، وہ ایسے تنقید کر رہے ہیں جیسے ایک لاکھ وینٹی لیٹرز اور 10 لاکھ حفاظتی کٹس چھوڑ گئے تھے، لگتا ہے وہ پنجاب کے ہر ضلع میں یورپ اور امریکا کی طرز کے اسپتال چھوڑ گئے تھے۔ شہباز شریف کا زہریلا پروپیگنڈا وائرس کورونا وائرس سے زیادہ خطرناک ہے۔ وہ اس برے وقت میں نیلسن منڈیلا بنیں گوالمنڈیلا نہیں۔