مختلف سیاسی رہنماؤں کا دورہ ایکسپریس سے اظہار یکجہتی

ایکسپریس میڈیا گروپ کے دفتر پر حملے کے بعد مختلف سیاسی جماعتوں کے رہنماؤں نے دفتر کا دورہ کیا اور حملے کی شدید الفاظ میں مذمت کی۔

رہنماؤں کا کہنا تھا کہ ایکسپریس میڈیا گروپ پر حملہ آزادی صحافت پر حملہ ہے ، حملے کے خلاف قومی اسمبلی میں آواز اٹھائی جائے گی ، تفصیلات کے مطابق گزشتہ روز ایکسپریس میڈیا گروپ کے دفتر پر نامعلوم افراد نے حملہ کیا جس کے بعد مختلف سیاسی جماعتوں کے رہنماؤں نے دفتر کا دورہ کیا ۔



متحدہ قومی موومنٹ سے تعلق رکھنے والے رکن قومی اسمبلی علی رضا عابدی نے دورے کے موقع پر کہا کہ حملے کے خلاف اسمبلی میں آواز اٹھائی جائے گی ، کسی کو بھی میڈیا کی آزادی سلب کرنے کی اجازت نہیں دی جاسکتی ، تحریک انصاف کے رہنما ڈاکٹر عارف علوی نے بھی دورہ کیا اور اپنے بھرپور تعاون کا یقین دلایا ۔






مسلم لیگ ن کے رہنما نہال ہاشمی نے کہا کہ پہلے حملے کے بعد تو دفتر پر سیکیورٹی زیادہ کی جانی چاہیے تھی ، اس بات کی بھی تحقیقات ہونی چاہیے کہ پہلے حملے کے بعد تعینات کی گئی پولیس موبائل کیوں ہٹائی گئی تھی، مسلم لیگ ق کے رہنما حلیم عادل شیخ نے کہا کہ ایکسپریس میڈیا گروپ پر حملہ کرکے سچ کی آواز کو دبایا نہیں جاسکتا۔



ہم ایکسپریس میڈیا گروپ پر حملے کی شدید الفاظ میں مذمت کرتے ہیں ۔علاوہ ازیں جماعت اسلامی کراچی کے امیر حافظ نعیم الرحمن اور سی پی ایل سی کے سربراہ احمد چنائے نے بھی ایکسپریس کے دفتر کا دورہ کیا ۔