کراچی میں مزید2 افراد جان سے ہاتھ دھو بیٹھے ٹارگٹڈ کارروائی میں 30 ملزمان گرفتار

شہر قائد میں ایک جانب رینجرز اور پولیس کے ٹارگٹڈ آپریشن جاری ہیں وہیں مختلف علاقوں میں تشدد زدہ لاشیں ملنے کا نہ ختم ہونے والا سلسلہ بھی تھم نہیں پارہا اور آج بھی اب تک 2 لاشیں برآمد ہوچکیں ہیں۔


ایکسپریس نیوز کے مطابق ایک شخص کی تشدد زدہ لاش نارتھ کراچی میں سلیم سینٹر کے قریب جبکہ دوسری لاش لیاری کے علاقے لی مارکیٹ میں کھجور بازار سے ملی ہے ، دونوں افراد کو تشدد کا نشانہ بنانے کے بعد گولی مار کر ہلاک کیا گیا ہے۔ پولیس نے قانونی کارروائی کے لئے لاشوں کو قریبی سرکاری اسپتالوں میں منتقل کردی۔

دوسری جانب شہر میں امن کے دشمنوں کے خلاف پولیس اور رینجرز کی تابڑ توڑ کارروائیاں بھی جاری ہیں اور مختلف علاقوں سے 30 ملزمان کو گرفتار کرکے ان کے قبضے سے اسلحہ ، منشیات اور دیگر سامان برآمد کرلیاہے، ترجمان رینجرز کے مطابق گرفتار ملزمان میں سیاسی جماعت کے کارکن بھی شامل ہیں۔