عالمی برادری پاکستان کی داخلی خود مختاری اور علاقائی سالمیت کا احترام کرے چین

پاکستان میں چین کے سفیر سن ویڈونگ نے کہا ہے کہ عالمی برادری پاکستان کی داخلی خود مختاری اور علاقائی سالمیت کا احترام کرے۔


اسلام آباد میں میڈیا کے نمائندوں سے گفتگو کے دوران چین کے سفیر کا کہنا تھا کہ ان کا ملک دہشت گردی کے خلاف جنگ میں پاکستان کی حکمت عملی کی مکمل حمایت کرتا ہے اور اس سلسلے میں پاکستان کو ہر ممکن معاونت فراہم کی جا رہی ہے اور عالمی برادری بھی پاکستان کی داخلی خومختاری اور علاقائی سالمیت کا احترام کرے۔

چینی سفیر کا کہنا تھا کہ سیاسی جماعتوں، ارکان پارلیمنٹ، مقامی حکومتوں، تھنک ٹینکس، نوجوانوں اور ذرائع ابلاغ کے وفود کے تبادلے بڑھانے سے پاکستان اور چین کے درمیان اسٹرٹیجک تعلقات مزید مستحکم ہوں گے، چینی کمپنیاں پاکستان کے بجلی پیدا کرنے والے پانی، تھرمل ، شمسی، ہوا اور ایٹمی توانائی کے منصوبوں میں سرمایہ کاری کرنا چاہتی ہیں، اس کے علاوہ دونوں ممالک دفاع، سمندری سلامتی اور زرعی شعبوں میں باہمی تعاون کو مزید مستحکم بنائیں گے۔