حکمرانوں نے بلدیاتی انتخابات کے نام پر قوم سے مذاق کیا عمران

تحریک انصاف کے سربراہ عمران خان نے کہا ہے کہ حکمرانوں نے بلدیاتی انتخابات کے نام پر قوم سے بہت بڑا مذاق اور قوم کو بیوقوف بنانے کا رنگین ڈرامہ کیا ہے اور اب تاریخ پے تاریخ کا نیا ڈھونگ رچایا جائیگا۔

پی ٹی آئی چنیوٹ کے صدر کی قیادت میں وفد سے گفتگو کرتے ہوئے انھوں نے کہا کہ پنجاب بھر کے لاکھوں بلدیاتی الیکشن میں حصہ لینے والے امیدواروں کے کروڑوں روپے ضائع ہوچکے جس کے ذمہ دار موجودہ حکمران ہیں۔ انہوں نے کہا کہ میاں برادران کا 11 مئی سے پہلے رنگ اور تھا اور اب اور ہوگیا ہے۔ انہوں نے کہا کہ ہم نے خیبرپختونخوا میں بلدیاتی الیکشن مارچ میں کروانے کا وعدہ کیا اور اس وعدہ پر قائم ہیں۔




انھوں نے مزید کہا کہ ملک مکمل طور پر تباہ کرنیکی سازش کی جارہی ہے اور ملکی حالات دن بہ دن تباہی کی طرف جارہے ہیں جبکہ دوسری جانب حکمرانوں نے ملکی بہتری کے نام جو قرضے لئے وہ کہیں دکھائی نہیں دے رہے۔ ان کا کہنا تھا کہ پنجاب کی عوام کو چاہیے کہ وہ حکمرانوں کی جعلی اور مفاد پرست پالیسیوں کیخلاف اٹھ کھڑے ہوں۔