پڑوسی ملک کارکنان کے قتل میں ملوث ہے اورنگزیب فاروقی

اہل سنت و الجماعت پاکستان کے مرکزی سیکریٹری اطلاعات مولانا اورنگزیب فاروقی نے کہا ہے کہ اہل سنت عوام کو جس طرح قتل کیا جا رہا ہے اس کے پیچھے پڑوسی ملک کے مضبوط گروہ کا ہونا بالکل نمایاں ہے۔

ملک بھر میں اہلسنت علما و کارکنان کو چن چن کر قتل کیا جارہا ہے، سفاک اوردرندہ صفت قاتل دینی مدارس کے نہتے اور بے گناہ طلبا کو بھی نشانہ بنارہے ہیں، علما انبیا کے وارث ہیں، ماہ ربیع الاول میں اہل سنت کا قتل کرکے ماہ مبار ک کے تقدس کو پامال کیا جارہا ہے، ان خیالات کا اظہار انھوں نے کراچی پریس کلب پر احتجاجی مظاہرے سے خطاب کرتے ہوئے کیا، مظاہرے کے شرکا سے ڈاکٹرفیاض اور مولانا تاج محمد حنفی نے بھی خطاب کیا۔




انھوں نے کہا کہ بدترین قتل عام کے باوجود حکومت قاتلوں تک پہنچنے میں کامیاب نہیں ہو سکی جو حکومتی چہرے پر بد نما داغ ہے، قاتلوں کے خلاف حکومت کا اب تک کسی قسم کا ایکشن نہ لینا بہت سے شکوک وشبہات کو جنم دیتا ہے، انھوں نے کہا کہ فرقہ واریت کے خاتمے کے لیے میڈیا اہم کردار ادا کرے، حکومت اور عدلیہ جو نہ کرسکی وہ کام میڈیا کرے، انھوں نے کہا کہ معروف اینکر پرسن جج کا کردار ادا کریں، سنی شیعہ کے معروف عالم دین بلائے جائیں، انھوں نے کہا کہ میں دعویٰ کرتا ہوں ملک میں جاری دہشت گردی میں تیسرا ہاتھ ملوث ہے۔