مشرف فرار ہوئے تو ذمے دار نواز شریف ہونگے سراج الحق

پختونخوا کے سینئرصوبائی وزیر سراج الحق نے کہا ہے کہ پرویز مشرف کو ملک سے فرار کرانے کی کوششیں کی جارہی ہیں، اگرمشرف فرارہوئے تو ذمے دار نوازشریف ہوںگے اورانھیں خود عدالت میں پیش ہونا ہوگا۔

پرویز مشرف لال مسجد میں شہید ہونے والی بچیوں اور ان کے خاندانوں کی بددعائوں کے نتیجے میں اس حال کو پہنچے ہیں۔ وہ جماعت اسلامی کے تحت تقریب سے خطاب کررہے تھے۔اس موقع پر اے این پی اور پیپلزپارٹی کی اہم شخصیات نے جماعت اسلامی میں شمولیت کا اعلان کیا۔




سراج الحق نے مزیدکہاکہ پرویزمشرف نے خود اعتراف کیاکہ عافیہ صدیقی کو میں نے امریکا کے حوالے کیا، پرویزمشرف عدالت میں پیش ہونے سے ڈرتے ہیں،ان کی بیماری ایک بہانہ ہے انھیں ایسی کوئی بیماری لاحق نہیں جو انھیں عدالت میں پیش ہونے سے روک رہی ہے۔انھوں نے کہاکہ وفاقی وزیر عابدشیر علی نے پختونوں کو چورکہا ہے، میں پوچھنا چاہتا ہوں کہ جب پانی ہمارا ہے، بجلی ہماری ہے اور پنجاب اس کو بے دریغ استعمال کررہا ہے تو چور کون ہوا؟ عابد شیر علی کو بہت جلد فیصل آباد میں ان کے گھر پر جواب دوں گا۔