دہشتگردوں کیخلاف موثر کارروائی کرنی ہوگی شاہی سید

عوامی نیشنل پارٹی کے قائد اسفند یار ولی خان اور سینیٹر شاہی سید نے پشاور میں چارسدہ روڈ پر تبلیغی مرکزمیں شب جمعہ کے اجتماع پر ہونے والے دھماکے اور کراچی کے مختلف علاقوں میں قانون نافذ کرنیوالے اداروں کے اہلکاروں پر فائرنگ اور دستی بم حملوں کی سخت مذمت کی ہے۔

انھوں نے کہا کہ دعوت و تبلیغ کا مرکز سب کیلیے قابل احترام ہے، اگر دہشت گردوں کو روکا نہ گیا تو سب کو پچھتانا ہوگا اور ان کے خلاف جامع پالیسی اپنانا ہوگی، سیکیورٹی فورسز پر حملوں کامقصددہشت گردی کے خلاف ان کے مورال کو ختم کرنا ہے تاہم ان شر پسندوں کے خلاف مؤثر اور نتیجہ خیز کارروائی کر کے پولیس اور رینجرز کو یہ ثابت کرنا ہوگا کہ ان کے حوصلے بلند ہیں اور وہ ان عناصر کے سامنے کبھی بھی پسپا نہیں ہونگے دہشت گردوں کو بھرپور طاقت سے کچلنا ہوگا۔




علاوہ ازیں پاکستان ڈیموکریٹک پارٹی کے صدر بشارت مرزا نے کہا ہے کہ حضوراکرمؐؐ نے ہمیشہ امت مسلمہ کورواداری، برداشت، مساوات ،بھائی چارے اور خلق خداکی خدمت کادرس دیا،انھوں نے کہا کہ اسلام میں ایک مسلمان کاخون دوسرے مسلمان پر حرام ہے جبکہ ایک انسان کے قتل کوپوری انسانیت کے قتل کے مترادف قراردیاگیاہے اورملک کے تمام مسالک کے جیدعلما نے بھی خودکش بم دھماکوں کوحرام قراردیا ۔