پاکستان کا بھارت سے 2000 میگاواٹ بجلی خریدنے کا فیصلہ

پاکستان نے بھارت سے بجلی خریدنے کے سلسلے میں اپنی کوششوں میں شدت لاتے ہوئے ملک سے500 میگاواٹ کے بجائے 2000میگاواٹ بجلی خریدنے کا فیصلہ کیا ہے اوراس سلسلے میں پاکستان کی ایک خصوصی ٹیم جلد نئی دہلی جائے گی۔

بھارتی میڈیا رپورٹ کے مطابق اسلام آباد میں پانی و بجلی وزارت کے اعلی حکام نے بھارت سے مزید بجلی حاصل کرنے کی تصدیق کرتے ہوئے کہا ہے کہ پاکستان نے بھارت سے500 کے بجائے اب2000میگاواٹ بجلی حاصل کرنے کی درخواست کی ہے تاہم بھارت نے500 میگاواٹ بجلی فراہم کرنے کا وعدہ کیا ہے جبکہ معاملے پر عنقریب دستخط ہوں گے ۔




رپورٹ کے مطابق اسلام آباد میں وزارت پانی و بجلی کے ایک ترجمان نے بتایا کہ پاکستانی ماہرین کی ٹیم آئندہ چند دنوں میں نئی دہلی کا دورہ کر کے بھارتی حکام سے بجلی حاصل کرنے کے معاملات پربات چیت کرے گی۔ٹیم میں بجلی اور پانی کے علاوہ دوسرے متعلقہ حکام شامل ہوں گے۔