پولیس اہلکارکے گھرسے ڈھائی لاکھ روپے کے 6 بکرے چوری

منظورکالونی میں پولیس اہلکارکے گھر سے نامعلوم ملزمان ڈھائی لاکھ روپے مالیت کے 6 بکرے چوری کرکے فرارہوگئے۔

واقعے کی سی سی ٹی وی فوٹیج بھی منظرعام پرآگئی۔ عیدالاضحیٰ قریب آتے ہیں شہرقائد میں قربانی کے جانوروں کی چوری کی وارداتوں میں نمایاں اضافہ ہوتا جا رہا ہے ۔ اتواراورپیر کی درمیانی شب بلوچ کالونی تھانے کے علاقے منظورکالونی جدون چوک کے قریب رہائش پذیرپولیس اہلکارعبداللہ کے گھرسے نامعلوم چورڈھائی لاکھ روپےمالیت کے6بکرےچوری کرکے فرارہوگئے۔


واردات کی سی سی ٹی وی فوٹیج بھی منظرعام پرآگئی۔ واردات 3 بج کر 45 منٹ کے قریب پیش آئی ،سی سی ٹی وی میں ملزمان کے چہرے واضح ہیں ۔

اطلاع ملنے پرپولیس موقع پر پہنچ گئی ۔ اس حوالے سے ایس ایچ او ہدایت حسین نے بتایا کہ متاثرہ پولیس اہلکار عبداللہ ہیڈ کوارٹرمیں تعینات ہے جس نے واردات سے متعلق تھانے میں درخواست جمع کرادی ہے جس کی روشنی میں مقدمہ درج کرلیا ہے ۔ جائےوقوع سے سی سی ٹی وی سمیت دیگر شواہد اکٹھا کرکے واردات کی تحقیقات شروع کردی ہیں۔