2020 پاک انگلینڈ سیریز کابینہ کی پی ٹی وی کو بھارتی کمپنی کو رقم ادا کرنے کی ہدایت

وفاقی کابینہ نے سرکاری ٹی وی کو ہدایت کی ہے کہ وہ 2020 کی پاک انگلینڈ سیریز کے حوالےسے بھارتی براڈ کاسٹر کمپنی کو واجب الادا 5 لاکھ ڈالرز کی رقم ادا کرے۔


ایکسپریس نیوز کے مطابق گزشتہ روز وفاقی کابینہ کے اجلاس میں وزیر اطلاعات فواد چوہدری نے پی ٹی وی کے ذمہ انڈین براڈکاسٹر کے بقایا جات کا معاملہ اٹھایا، جس پر کابینہ نے پی ٹی وی کو ہدایت کی کہ انڈین براڈکاسٹر سونی پکچرز کو بقایاجات ادا کرکے معاملہ حل کیا جائے۔

واضح رہے کہ پاکستان کی قومی ٹیم نے 2020 میں انگلینڈ کا دورہ کیا تھا، سرکاری ٹی وی نے دونوں ٹیموں کے درمیان میچز بھارتی براڈ کاسٹ کمپنی سونی پکچرز سے معاملات طے کرکے براہ راست نشر کئے تھے تاہم اس حوالے سے سرکاری ٹی وی پر 5 لاکھ ڈالرز کی رقم اب تک واجب الادا تھی۔